Нови опремени простории за НВО секторот во Општина Новаци
По целосната реконструкција на објектот за кој се погрижи општина Новаци, Центарот за развој на пелагонискиот плански регион го промовираше опремувањето на младинскиот културен центар во оваа општина. Овој центар со подршка на Агенцијата за финансиска подршка на земјоделството и руралниот развој изврши комплетно уредување на просториите младинскиот центар. Вкупната вредност на проектот изнесува 2.564.314 денари. Во целокупната инвестиција е вклучена и општина Новаци со учество од 18%. Младинскиот центар е опремен со најразличен канцелариски инвентар и се она што е потребно за во иднина непречено да функционира и да се реализираат најразлични активности, настани, проекти, кои што пак ќе придонесат за унапредувањето на социјалниот и културниот живот во општина Новаци.
-Со уредувањето на младинскиот културен центар се обезбедуваат услови за реализација на настани од различен вид, културни, едукативни, забавни настани и собири. Младинскиот културен центар ќе претставува катче за социјализација и креативно дружење на младите, но истиот ќе биде погоден и за различни настани наменети за сите возрасни групи на граѓани од општина Новаци. Со опремувањето на младинскиот културен центар се обезбедуваат услови за активирање на младите во различни активности, настани и проекти кои ќе придонесат за унапредување на социјалниот и културниот живот во Општина Новаци, изјави Емилиа Ѓероска директор на ЦРППР-Битола.
Наскоро се очекува овој центар и свечено да биде пуштен во употреба. До тогаш ќе се знае и кој се ќе може да ги користи просториите и што се ќе може да се организира во истите.
-Порано оваа зграда беше целосно руинирана, сега доби комлетно нов лик.Ќе можат да го користат сите заинтересирани страни, невладини организации итн. Долниот спрат од оваа установа се деловни простории кои што општина Новаци планира да ги издава. Денес не е свечено отварање, зградата ќе биде пуштена во употреба дополнително. Општина Новаци инвестира во овај проект 5 милиони и 800 илјади денари, а го доби на користење од УЈП со потврда од Владата на Р.М., изјави Лазар Котевски градоначалник на општина Новаци.
Ова е еден од 10 те проекти кои минатата година беа одобрени од Агенцијата за финансиска поддршка во земјоделството и руралниот развој, преку Програмата за финансиска поддршка на руралниот развој во Република Македонија, а чиј апликант е ЦРППР. Вкупната вредност на сите 10 проекти изнесува 1 милион евра.